其實想轉第二度blog好耐，只係成日懶唔想郁，呢兩日終於

 

「的」起心肝攪攪個新屋，所以以後要嚟探小公主同fong嘅朋友

 

仔，請移玉手（步）到  http://yeeman1106.mysinablog.com/

              呢排覺得湊小公主湊得特別辛苦，因為小公主好唔聽話，無論叫佢做乜，佢都大多數不服從，有時重覺得佢專登鬥氣添

 

              好似每次食飯咁，佢好鍾意食嘢，但每次唔肯坐定，成日企喺張櫈度，我點叫都唔肯坐，有時坐低唔夠30秒又企番起身。佢唔會扭落地，除咗食飽，因為對腳一掂地下，我就唔會再比佢食。但係佢嘅行為好危險，我成日都驚佢趺親。有時佢跌咗啲垃圾落地下，我叫佢執番然後掉落垃圾桶。（當然小公主係識得掉垃圾，一向覺得係好有成功感嘅遊戲嚟。）但係佢又專登同我鬥氣，就算我點樣威迫利誘都唔肯做。

 

               小公主嘅行為令我好激氣，次次同佢抗衡，次次都要佢屈服為止。每次都會令我覺得唔開心，我明白小朋友係會喺某啲階段作出唔同嘅試探。但每當佢叫極都唔聽嘅時候，我就要抑壓自己想發脾氣嘅情緒，繼續用平靜嘅態度去引導佢，我真係覺得好難頂...

               「公德心」呢樣嘢，個人覺得唔止係掉垃圾、隨地吐痰咁簡單，我覺得有啲父母都無乜公德。

 

                前幾晚同我媽媽（小公主婆婆），仲有啲親朋戚友外出酒樓晚膳，我阿姨、姨丈同埋佢約六歲嘅女兒都有出席，佢哋嘅教女方式，我一向都不敢苟同，年紀小小已成了個「魔鬼細路」，佢夠胆大庭廣眾「星」佢阿媽一巴。

 

               佢嘅「魔鬼事跡」遲啲有機會先講，今次離譜嘅係，佢出緊水荳佢父母重帶佢出街。見到佢咁樣真係有啲驚，我驚佢傳染比小公主，（小公主因為五月頭打咗混合針，要再等多兩星期先打得水荳針，）真係估佢唔到有呢一着。當然阿姨始終係我長輩，我唔方便出聲，所以我就叫阿媽話佢知，唔好帶佢個女埋嚟，不過大家都坐喺同一席上，傳染嘅機會都唔細架，如果傳染就多得佢唔少....

 

                其實有冇傳染小公主係另一回事，問題係佢哋出門、撘車、嚟到多人嘅酒樓之上，可能已傳染咗比好多人。我嬲嘅係點解啲人永遠唔會替人設想一下，如果小公主有病，即使去診所我都唔敢同其他小朋友太靠近，免得再互相傳染，我真係好難理解佢哋嘅做法。佢哋都唔係第一次，記得有次佢個女嚴重傷風，佢重夠胆帶佢嚟同我個女玩，當時小公主只得三、四個月咋！我覺得呢啲父母好無公德...

               珍珠來匆匆，去匆匆，嚟果陣都令我好擔心，有咩事要再帶小公主睇醫生就麻煩。不過走咗之後令空氣清新咗，忍唔住要「索」多兩啖，可能過多一、兩日又會再濛過（空氣污染）。打風後最大嘅好處，就係令污糟邋遢嘅空氣變得乾淨晒。

 

               小公主也好轉過來，這幾天都是痾兩三次。同容子講法一樣，小公主真係好餓，食完一餐又想再食，我無制止佢。我諗如果唔係太過份嘅話就由得佢。都痾咗成過禮拜，依家食番多啲補番數都應該嘅。

 

             可能照顧小公主唔夠休息，所以我呢兩日都有啲感冒，尋晚小公主瞓得好穩，令我一覺瞓天光，今日精神好好。

 

             當有時覺得情况差到不能再差嘅時候，慢慢好嘅事就會番嚟。

 

             另外喺度要感謝各位blog友的關心，雖然未能夠即時回覆留言，但當我看到你們的問候時，心裡就覺得很温暖。

               小公主喺11號仍肚痾不绝，而且大便中有血絲，我就同佢去咗急症室，醫生覺得佢痾得太耐仲仍然發燒，所以要小公主留院，上到病房醫生同佢做檢查，攞咗啲大便化驗，就話佢應該係腸胃炎。我都話唔係打混合針嘅反應啦！之前睇咁多醫生又唔信！

 

              

               不過醫生話唔會同佢止痾，因為咁會令啲菌困住喺身體，如果細菌四圍走仲麻煩，所以小公主不停係咁痾又發燒。好彩就係佢無嘔，同埋肯飲水，如果唔係吊鹽水仲慘。但係喺醫院住都唔見得好好，因為係肚痾病人需要住隔離室，醫護人員同家長要着保護衣，而且小公主嘅活動範圍只係佢果張床仔，每次見到醫生、姑娘就大喊，佢好驚人哋攪佢。

 

             

               我都覺得好辛苦，因為喺病房家長係唔准飲食，每次都要等小公主熟睡我先敢出去食嘢，又無人幫到我接更，老公又要番工。我唔敢俾小公主見住我行開，因為佢真係好驚，見佢坐喺度都無啦啦喊....我又幫唔到小公主，只可以坐喺床邊陪佢，每次姑娘或者醫生要做檢查時，佢總係用求救嘅眼神望住我，我覺得好心痛，寧願病嘅係自己。其實老公都好辛苦，佢放工後就會嚟轉我番屋企休息，然後老公陪小公主過夜，第二朝我上番嚟佢就繼續返工，佢更加無得休息....

 

              所以第二日（12號）醫生話小公主情况有好轉，建議不如帶佢番屋企休息，我當然即刻應承。不過醫生話佢仲會痾同微燒，只要無嚴重咗就得，等痾清啲菌就會好，如果嚴重番就要番去喇！

 

 

             小公主都算係一日好過一日，今日（１５號）已經無燒，朝早有少少痾，我諗佢應該差唔多好番。

 

            

              小公主仍是發燒當中，不過尋日開始唔單只發燒，仲嚴重地肚痾。粗略估計，小公主尋日痾咗十幾次，今朝起身又痾過，總知食小小嘢落肚就會即刻痾，眼見佢痾到小PAT PAT 都紅晒。可能PAT PAT 損咗嘅關係，小公主唔肯比我探熱，每次都喊得好淒涼，真係覺得好肉痛...

 

              尋晚見勢色唔對，帶咗佢去睇急症，事關小公主痾得太勁，但係醫生只話有可能係食小兒麻痺劑嘅關係，叫我再觀察多兩日，如果情况無改善就再帶佢番嚟咁話，另外開咗啲止瀉劑比佢。其實去之前都估到醫生會點講，因為啱啱前日打咗針，但係我真係担心小公主會唔會食錯啲乜嘢嘛！既然醫生咁講，咪小心觀察住先...

               尋日下午同小公主去健康院打針，初時佢都好開心架，因為實在有太多小朋友喇！有哥哥、姐姐，仲有啲剛出世嘅弟弟、妹妹，小公主又以佢一向八卦嘅性格喺度滿塲飛，機乎成間健康院每一個角落都「八」晒。

              

               小公主依家有27磅，好似真係重咗啲，希望大個唔會係肥妹啦。至於言語能力方面，我就覺得佢進展得比較遲，暫時仍只識講少數單字，不過姑娘話喺兩歲前仲係觀察期，只要小公主聽得明白，識得跟從指示，亦未算有問題。

              

               到拮針嘅時候，當然又係哇哇大叫，但今次嘅反應嚟得好快，打完針半個鐘頭到就開始發燒，我當然「拿拿林」番屋企啦，比咗藥佢食仍然都唔退燒，反而越燒越高。去到半夜已經燒到104度，我越來越担心，始終去到104度就唔嘢少，如果佢繼續唔退燒或者再燒高啲，我就帶佢去急症，出奇地，臨天光果陣又退番102度（啲小朋友梗係喺半夜嚟玩高燒）。又加上小公主婆婆話，歲半開始嘅混合針都係加強劑，相對ＢＢ反應都會大啲，只要唔係持續高燒係可以觀察吓先，所以我先無咁騰鷄咋。

       不過小公主仍然好精神，仲可以沖多涼，抹多幾次身，又有水玩都唔知幾開心.....

               話說尋日我未去街之前，同老公、小公主仲有個朋友去食午飯。我哋去咗間餐廳，坐喺啲卡位度，老公同小公主坐，我就同我朋友坐，可以方便傾偈嘛。間餐廳啲卡位好闊落，我諗坐三個人仍然好鬆動，所以小公主可以自由活動，一時坐喺度玩，一時企喺度。正當我同朋友傾得興起之際，突然小公主一秒間喺我哋嘅對面消失咗。（其實係小公主坐得太出，佢又郁嚟郁去，結果好似「sir」滑梯咁「sir」咗落枱底）我嚇咗一跳，三個大人不約而同向枱底看，小公主仲傻傻地咁坐咗響度唔郁，我老公即刻「執」番小公主上嚟，我諗小公主有啲驚，因為神情有啲呆，不過我同朋友喺度哈哈大笑，緩和咗佢驚嘅情緒。不過當時嘅情况真係好好笑架。

               尋日老公放假幫我湊咗小公主一天，而我就放假一天同朋友去街街其實係因為夜晚有個聚會，我又想自己去，所以老公就請假幫我睇個女。

 

              呢一日嘅假期都幾開心，先同朋友去唱咗兩個鐘卡拉ＯＫ，我都有幾年無去過，雖然好多歌都唔識唱，不過都好好玩。晚上去聚會度見番好多好耐無見嘅姊妹真係好開心架！仲俾我抽到獎添！雖然唔係咩大獎只係個小咕，但對於我呢個永無抽獎運嘅我，等於中大獎喇！

 

             就係咁就放咗一天假，謝謝老公幫忙我先享受到一天假，而佢照顧小公主時都好細心體貼，啱啱post果啲新相，就係佢帶小公主去影

               唉！屋企部電腦好似我咁樣short short地，老公話要重新reset過電腦，之後又話要裝番晒啲嘢，攪到我無得用電腦。

 

              講番小公主先，呢個星期終於肯食番啲嘢，唔...都可以話回後正常分量。我認為小公主之所以無胃口，係因為佢最後兩只大牙累事，我見佢一食啲硬或者要嘅嘢，小公主就會吐出嚟，表現到好唔想食咁。而檢查佢口仔就見到兩邊有大牙出緊，又紅又腫添呀！好彩又唔見佢發燒。近呢個星期消咗腫，見到白白嘅牙仔出咗嚟。